Navigeer Die Moderne Kognitiewe Landskap In Alle Stadiums Van Die Lewe
Die brein soek altyd inligting, so dit wil voortdurend uitvind wat nuut is. In 'n eindelose see van aanlyn inligting, kan ons maklik sekere inligting kry en dan vinnig aanbeweeg na die volgende onderwerp waarin ons belangstel. Dit kan egter jou fokus en konsentrasie negatief beïnvloed. Probeer die volgende maniere om jou konsentrasie te verbeter:
Vermy Elektroniese Toestelle Vir 'n Paar Ure Van Die Dag
In vandag se digitale era is skerms (“screens”) orals, en dit deurdring byna elke aspek van die daaglikse lewe. Van slimfone en tablette tot rekenaars en televisies, digitale skerms bied gerief, konnektiwiteit en vermaak. Die wydverspreide gebruik van digitale toestelle het egter kommer laat ontstaan oor hul potensiële impak op kognitiewe funksies, veral konsentrasie. Die meeste mense gryp hul slimfone of skakel hul rekenaars aan sodra hulle hul oë soggens oopmaak. Waarvoor jy dit ook al gebruik; die gebruik van elektroniese toestelle kan 'n negatiewe uitwerking op jou konsentrasie hê.
Die voorstel is nie dat jy ophou om op sosiale media te wees of om jou persoonlike E-posrekening heeltemal uit te vee nie. Probeer eerder om elektroniese toestelle vir 'n tydperk gedurende die dag te vermy.
Verlengde tydperke van skermtyd (“screen time”), veral wanneer jy betrokke is by kognitief veeleisende aktiwiteite soos werk of “gaming”, kan bydra tot kognitiewe moegheid en mentale uitputting. Langdurige blootstelling aan digitale skerms, veral in die aand, kan slaappatrone ontwrig en gevoelens van moegheid vererger. Dit kan lei tot verminderde waaksaamheid en konsentrasie gedurende jou “wakker ure”.
Om die eerste uur van die dag sonder jou slimfoon of rekenaar deur te bring, kan jou help om jou dag met 'n gevoel van beheer en fokus te begin, terwyl die laaste uur jou 'n kans sal bied om te ontspan en behoorlik voor te berei vir slaap.
Skep 'n Te-Doenlys Vir Afleidende Gedagtes
Dit is moeilik om terug te keer na jou oorspronklike taak nadat jou gedagtes afgelei is. 'n Goeie voorstel is om 'n notaboek rond te dra waarin jy al jou afleidende gedagtes kan neerskryf.
Wanneer jy aan 'n spesifieke taak werk, kan sekere afleidende gedagtes soos “wonder oor hoe die weer more gaan lyk of watter fliek om te kyk” dalk in jou kop opduik. Wanneer hierdie tipe gedagtes in jou kop opduik, skryf dit net neer en herinner jouself dat jy dit sal opsoek sodra jy klaar is met jou bestaande taak.
Begin Mediteer
Meditasie sal jou nie net help om te leer hoe om in die hede te leef en meer ontspanne te wees nie, maar dit kan ook jou fokus en konsentrasie verbeter. Meditasie kan jou help om om jou gedagtes helder te kry, sodat jy sodoende beter op jou huidige taak kan fokus. Om te mediteer hoef nie te veel tyd uit jou dag te neem nie. Net 10 tot 20 minute per dag is meer as genoeg om meer produktief te word en om jou te help om op die hier-en-nou te fokus.
Raak Betrokke By Fisieke Aktiwiteite
Gesonde leefstylpraktyke, insluitend gereelde oefening, gebalanseerde voeding, voldoende slaap en stresbestuur, kan breingesondheid bevorder en optimale konsentrasie ondersteun.
Om gereeld te oefen, sal nie net jou fisiese gesondheid verbeter nie, maar blyk ook help om jou brein fiks te hou. Volgens 'n studie wat deur die Universiteit van Illinois gedoen is, presteer studente wat aan matige fisiese oefening deelneem beter in sommige kognitiewe take as diegene wat dit nie doen nie. (https://www.sciencedaily.com/releases/2009/03/090331183800.htm).
Handhaaf Balans En Neem Deel Aan Leeraktiwiteite
Lewenstylfaktore speel 'n deurslaggewende rol in die vorming van kognitiewe gesondheid en konsentrasievermoëns oor al die fases van die menslike leeftyd. Dit maak nie saak hoe oud jy is nie, kyk na jou persoonlike gesondheid, hou `n balans tussen jou werk en persoonlike lewe, en volg aktiwiteite wat die verstand stimuleer en `n passie vir leer aansteek, Neem deel aan aktiwiteite wat jou positief uitdaag, jou inspireer en jou brein skerp en ondersoekend hou.
Ten Slotte:
Om die voordele van tegnologie te balanseer met bewuste (“mindful”) skermgebruik is noodsaaklik vir die bevordering van gesonde kognitiewe gewoontes en die handhawing van optimale konsentrasie in 'n toenemend digitale wêreld. Dit is moontlik om kognitiewe funksie en lewenskwaliteit te ondersteun deur 'n holistiese benadering te volg wat verskeie determinante van konsentrasie aanspreek.
Hierdie blog plasing is slegs ter inligting. Dit moet nie as terapie beskou word nie. Hierdie blog is slegs vir inligting en opvoedkundige doeleindes en moet nie as terapie of enige vorm van behandeling beskou word nie. Ons kan nie reageer op enige spesifieke vrae of kommentaar lewer op persoonlike situasies, toepaslike diagnose of behandeling nie, of andersinds kliniese opinies lewer nie. As jy dink dat jy onmiddelike hulp nodig het, kontak asseblief jou plaaslike dokter/ sielkundige/ psigiater of die SADAG Geestesgesondheids Hulplyn op 011 234 4837. Indien nodig, kontak asseblief die Selfmoordkrisislyn by 0800 567 567 of sms 31393.