Besef jy die direkte impak van ‘n gesonde gees op jou liggaam? Emosies is geneig om in ons fisiese liggaam te manifesteer. Byvoorbeeld, "brand" jy van woede of "bewe" jy van vrees? As jy al ooit depressief was of gevoel het dat daar net nie 'n rede is om uit die bed op te staan nie, het jy waarskynlik ook meer pyne en skete ervaar.
Wanneer ons daaraan werk om 'n gesonde gees te hê, volg ons liggaam die voorbeeld. Kom ons kyk na 'n paar maniere waarop 'n gelukkige, gesonde ingesteldheid ons fisiese gesondheid verbeter.
Welstand is prioriteit
Diegene met 'n gesonde gees is meer geneig om na hul fisiese welstand om te sien. Ons kry net een liggaam ons leeftyd. Vir gelukkige mense is hul gesondheid en welstand as 'n topprioriteit. Selfsorg is van kardinale belang.
Net so belangrik is 'n behoorlike dieet, gereelde oefening en roetine gesondheidsondersoeke. ’n Gesonde gees help ons om verskonings te vermy, want ons weet hoe lekker dit voel om geestelik en fisies goed te voel.
Siektes word beter en makliker bestry
Nie net het mense met 'n gesonde gees 'n beter immuunstelsel as nors buffels nie, dit is vir hulle ook makliker om siektes te beveg.
’n Positiewe gesindheid gaan vêr, en gelukkige mense is die perfekte voorbeeld. Van ‘n gewone verkoue tot ernstige siektes is die lewenskwaliteit van diegene met 'n gesonder ingesteldheid aansienlik beter. En hul hersteltyd is aansienlik vinninger!
'n Langer, gesonder lewe
Mense wat na hul geestesgesondheid omsien, sien meer waarskynlik ook om na hul fisiese gesondheid. Dit lei tot 'n langer, gelukkiger, gesonder leeftyd. As jy kan dood gaan van 'n gebroke hart, moet die teenoorgestelde ook waar wees. 'n Gelukkige geaardheid en 'n positiewe gesindheid kan jare by ons leeftyd byvoeg!
Strategieë om 'n gesonde gees te ontwikkel
Wees lief vir jouself
Wanneer jy jouself liefhet en vir jouself omgee, skuif lae selfbeeld en selfvertroue kwessies opsy. Jy mag op die maat van jou eie drom dans. Jy hoef nie altyd in te pas om jouself lief te hê nie. Jy moet die skoonheid in jouself herken voordat enigiemand anders dit sal doen.
Doen iets waarvan jy hou
Ons is geneig om die "lewe" as 'n verskoning te gebruik om nie tyd te hê om dit te geniet nie. Maak tyd om iets te doen waarvan jy hou. Dit is 'n goeie stresverligter en verhoog die goedvoel-chemikalieë in jou brein.
Moet nooit ophou leer nie
Probeer om elke dag iets nuuts te leer. 'n Skerp brein is 'n gelukkige brein. Dink aan jou brein as 'n spier; jy moet dit oefen om dit fiks te hou. Lees 'n boek. Leer 'n nuwe vaardigheid aan. Speel trivia. Maak van leer pret!
Haal asem
Om bewustheidsoefeninge in jou daaglikse roetine in te sluit, is 'n goeie manier om stres te voorkom en jou veerkragtigheid te verhoog wanneer die lewe jou platslaan.
Asemhalingstegnieke help nie net om aan jou brein suurstof te voorsien nie, maar help jou ook om meer in kontak te voel met jou fisiese liggaam. Dit is amper asof jy fisies kan voel hoe stres en spanning losgelaat word en jou nie langer gevange kan hou nie.
Jy is wat jy eet
As jy gesond wil wees, in beide gees en liggaam, moet jy ook gesond eet. As jy oorleef op gemorskos, beroof jy net jouself van gesondheid. Probeer om weg te bly van verwerkte voedsel en streef na 'n gebalanseerde dieet. Beide jou liggaam en gees sal jou bedank!
Beweeg!
Het jy al ooit opgemerk dat mense wat klaar geoefen het omtrent altyd in 'n goeie bui is?
Om aktief te wees het veel meer as net fisiese waarde. Dit verbeter ons selfbeeld en laat ons meer bekwaam voel. Ons word sterker en meer selfversekerd. Fisiese aktiwiteit is 'n sleutelkomponent vir 'n gesonde gees. 'n Gesonde gees lê die grondslag vir 'n gesonde liggaam. Baie van die dinge wat ons doen om gesond van gees te wees en dit te handhaaf, bevorder ook fisiese gesondheid. Dit is amper soos ‘n koop-een-kry-een gratis uitverkoping by jou gunsteling winkel! Verandering verg tyd en volharding, maar moenie moed opgee nie. Jy is die moeite werd!
Slaap
‘n Goeie nagrus is een van die belangrikste sleutels om goeie algemene gesondheid en welstand te ontsluit. Jou liggaam maak staat op slaap om noodsaaklike funksies uit te voer, veral in jou brein.
Dit is nie net jou liggaam wat besig is om te herstel nie. As jy minder as sewe uur elke aand slaap, is daar 'n goeie kans dat jy swak punte sal kry vir ‘n IK-toets. Terwyl jy slaap, is jou brein besig om herinneringe te konsolideer en te stoor.
‘n Gesonde slaappatroon reguleer jou fisiese, emosionele en geestelike gesondheid. Jy het ook meer energie en is dan slaggereed om die dag wat voorlê aan te pak.
Ten slotte
In werklikheid is niks in die lewe seker nie. Tog kan ons planne maak en uitvoer wat ons 'n groter kans kan gee om betekenisvoller lewens te lei. Gesonde gewoontes is een van die dinge wat ons kanse verhoog om die meeste van ons lewenservarings te maak. Niemand wil siek wees nie. Wens is egter nie genoeg nie. Jy moet doelbewuste stappe neem wat jou kanse sal verbeter om jou uit die dokter se spreekkamer te hou.
Jy is die afgelope weke blootgestel aan baie wenke en metodes wat jou kan help om jou fisiese en geestelike gesondheid ’n hupstoot te gee. Maak daarvan gebruik om die kwaliteit van jou lewe te verbeter. Jy sal beter oor jouself voel as jy sien hoe die veranderinge besig is om te gebeur. Niks goeds kom egter van self nie. Om hierdie pad van ‘n gesonder leefstyl te bly volg, moet jy vasberade en gedissiplineerd wees. Onthou die lewe te kort is om in pyn, lyding en angs te leef. Belê dus in jou gesondheid; dit is al wat jy het.
My uitdaging aan jou is dit: wees buitengewoon. Sterkte!
Hierdie blog plasing is slegs ter inligting. Dit moet nie as terapie beskou word nie. Hierdie blog is slegs vir inligting en opvoedkundige doeleindes en moet nie as terapie of enige vorm van behandeling beskou word nie. Ons kan nie reageer op enige spesifieke vrae of kommentaar lewer op persoonlike situasies, toepaslike diagnose of behandeling nie, of andersinds kliniese opinies lewer nie. As jy dink dat jy onmiddelike hulp nodig het, kontak asseblief jou plaaslike dokter/ sielkundige/ psigiater of die SADAG Geestesgesondheids Hulplyn op 011 234 4837. Indien nodig, kontak asseblief die Selfmoordkrisislyn by 0800 567 567 of sms 31393.